हामी नेपाली - हाम्रो नेपाल - समृद्ध नेपाल

स्वदेशी वस्तुइ मिखा ब्वयेगु कुतः याये

दि. दि. शि. यल/ बिचाः/च्वसु - November 2, 2015
Dinesh Shilpakar

नेपाःया आर्थिक अवस्था न्हापा स्वयाः निदुगं, स्वदुगं नाजुक जुजुं वनाच्वंगु दु । झी सकसिनं स्यूगु हे खँ खः, थुकिया मू हुनि धइगु सकसिनं राजनीतिक लकसं यानाः जुयाच्वंगु खँय् सुयाःगु नं निगू मत दइमखु । उकिसनं झीसं थःगु हे देशय् उत्पादन जुइगु वस्तु स्वयाः नं विदेशी वस्तुइ अप्वः आकर्षित जुयाच्वंगु दु ।

झीथाय् देशय् उत्पादन जुयाच्वंगु आपालं वस्तुत दु तर, झीसं उकियात उलि प्राथमिकता बियाः वयाच्वनागु मदु । उकिं झीसं यदि थःगु हे देशय् उत्पादन जुइगु थीथी वस्तु झीसं यदि छ्यल धाःसा थुकिं देय्या आर्थिक विकासय् आपालं तिबः जुइ । देय्या आर्थिक विकास जुइगु धइगु झीगु नितिं बांलाःगु पक्ष खः । यदि देय्या आर्थिक विकास जुलधाःसा झीगु देय्या विकास जुइगु स्वाभाविक खः, थुकिं याना आर्थिकंनिसें कयाः भौतिक पूर्वाधारय् नापं बांलाःगु लिच्वः लाइगु खँय् झी सकसिनं वाःचायेके हथाये जुइधुंकूगु दु ।

गथेकि झीसं नगरपालिकाय् थीथी कर पुलेगु यानाच्वनागु दु व झीगु नितिं छ्यलाबुलाः जुयाच्वंगु दु धइगु झीसं वाःचायेकाः च्वनागु दु । थुकथं हे स्वेदशी वस्तुइ नं झीसं बांलाक्क ध्यान बियाः वनेफत धाःसा कन्हय् वना झी थःपिं नं थःगु व्यापार, व्यावसाय सबल यायेफइ, गबलेतक्क झी परनिर्भर जुइ अबलेतक्क झी थौंया अवस्थाय् हे म्वायेत बाध्य जुइफु । उकिं गबलेतक्क देय्या विकास जुइमखु, अबलेतक्क स्वयम् झीपिं नं थहाँ वयेफइमखु धइगु झीसं वाःचायेके हथाये जुइधुंकूगु दु ।

गुलि गुलिसिनं थ्व खँयात बांलाक्क हे वाःचायेका च्वंगु दु, तर व्यावहारय् थ्व खँयात उलि वाःचायेका च्वंगु मदु । अले पलाः नं न्ह्याकाः च्वंगु खनेमदु । पश्चिमा देशं वःगु आपालं वस्तु झीसं आपालं धेबा पुलाः न्यायेगु बानी दु तर, झीगु देशय् हे उत्पादन जुयाच्वंगु वस्तु दंक भावं न्यायेगु झीगु बानी मदु । थ्व धइगु झीसं थःगु देय्यात थःथःम्हं गालय् क्वःफायेगु थेंज्याःगु ज्या जुयाच्वंगु दु । थुलि जक मजूसे थःपिंसं लगानी यानाः ज्या यानाच्वंपिनिगु नितिं थ्व झन् तःधंगु हे बिडम्बनाया रूपय् न्ह्यःदे दं वयाच्वंगु दु ।

लगानी याइपिंसं गुगु आशा व भलसा यानाः लगानी याइ, थःगु परिश्रम फुक्क उकिइ छ्यली तर, उगु ज्यां थहाँ वयेफयाच्वंगु मदु । गुकिं यानाः चायेकं मचायेकं बांमलाःगु ज्याय् ल्हाः तःवनेगु नितिं बाध्य जुयाच्वंगु दु । थुकिया दोषी नं झी स्वयम् हे खः । उकिं गबलेतक्क झीसं थःगु देय्या आर्थिक अवस्था बांलाकेगु नितिं झीसं कुतः याइमखु, उबलेतक्क झी स्वयम् थःपिं नं न्ह्यःने न्ह्यायेफइगु अवस्था मदु ।

झीसं देय् विकास यायेगु नितिं, आर्थिक अवस्था बांलाकेगु नितिं, उकियात थकायेगु नितिं झीसं राजनीतिइ हे पलाः तयेमाः धइगु नं मदु । थुकिया नितिं झीसं अःपुक्क यायेफूगु ज्या धइगु थःगु हे देशय् उत्पादन जुयाच्वंगु वस्तुत गथेकि नयेगु नसा ज्वलंनिसें कयाः पुनेत माःगु वस्तु व छेँया नितिं मदयेकं मगाःगु बजारय् दुसा उकियात झीसं प्राथमिकता बियाः झीसं छ्यलेफयेके माःगु दु ।

उकिं झीसं आवंनिसें हे थःगु हे देशय् उत्पादन जुइगु वस्तुइ अप्वः प्राथमिकता बियाः आर्थिक अवस्थाय् सुधार हयेगु कुतः याये, थुकिया नितिं सकलसिनं उलि हे महत्वपूर्ण भूमिका म्हितेमाःगु दु । झीसं स्वदेशी वस्तुइ मिखा ब्वयेगु कुतलय् आवंनिसें हे बानी याये, थःथःम्हं थःगु तुतिइ दनेफयेकेगु लकस तयार याये ।

प्रतिबद्धता मखु, कार्यान्वयनया आवश्यकता

राजनीतिक दलत घोषणा पत्र दयेकेत माहिर खनेदु, तर देय् व नागरिकप्रति सचेत व उत्तरदायी जुयाः उगु घोषणा पत्र कार्यान्वयन यायेत ताःमलाःगु दु । कार्तिक १३,...