हामी नेपाली - हाम्रो नेपाल - समृद्ध नेपाल

भारतं गोप्य ढंगं परमाणु शहर निर्माण यानाः च्वंगु पाकिस्तानया द्वपं

इन्फोनेपाल संवाददाता/ देय्पिनेया बुखँ - February 10, 2017
Nafees-Zakaria

एजेन्सी, सिल्लाथ्व चतुर्दशि
भारतं गोप्य ढंगं परमाणु शहर निर्माण यानाः च्वंगु द्वपं पाकिस्तानं तःगु दु । पाकिस्तानी विदेश मन्त्रालयया प्रवक्ता नफीस जकरियां भारतं गोप्य ढंगं परमाणु शहर दयेकाच्वंगु बहः ब्यूगु दु ।

पत्रकारतय्लिसे जकरियां भारतं अन्तर–महाद्विपीय मिसाइलया परीक्षण यानाच्वंगु व थुखेपाखे थुगु क्षेत्रया हे सामरिक सन्तुलन स्यनेगु जानकारी ब्यूगु दु ।

भारतं आपालं स्वयाः आपालं ग्याचिकु ल्वाभः मुंकातःगु धकाः ज्या पनेत अन्तर्राष्ट्रिय समुदाय छधि छप्प जुइमाःगु नं पाकिस्तानं जानकारी ब्यूगु दु । भारत थ्वहे गतिइ न्ह्यःने न्ह्यानाः च्वन धाःसा थःपिनिगु बचाउया नितिं तयार जुइमाःगु विकल्प पाकिस्तानलिसे मदुगु प्रवक्ताया धापू दु ।

भारतं धाःसा पाकिस्तानया थुगु द्वपंयात कपोलकल्पित धकाः अस्वीकार याःगु दु । भारतीय विदेश मन्त्रालयया प्रवक्ता विकास स्वरुपं द्वपं निराधार व कपालकल्पित दुगु जानकारी ब्यूगु दु ।

थुकीयान्ह्यः सन् २०१५ सं अमेरिकी पत्रिका फरेन पोलिसं नं भारतं गोप्य ढंगं परमाणु केन्द्र निर्माण यानाःच्वंगु व उखेपाखे हाइड्रोजन बम दयेकेगु क्षमता अप्वयेकेमाःगु लक्ष्य दुगु दावी याःगु खः ।